Hafþór Júlíus Björnsson, aflraunamaður og leikari opnar í dag líkamsræktarstöðina Thor´s Power Gym á Dalvegi 16B í Kópavogi.

Hafþór býður gestum og gangandi að líta við frá og með klukkan fjögur í dag en léttar veitingar verða í boði. Hafþór Júlíus, sem gjarnan er kallaður Fjallið, hefur undanfarin ár rekið Thors Power Gym í húsnæði við Auðbrekku 2 í Kópavogi en starfsemin hefur sprengt húsnæðið utan af sér og því er flutningur innan bæjarfélagsins rökrétt framhald.

Hafþór var í óða önn að gera og græja þegar blaðamaður DV náði tali af honum. „Já, ég er bara að leggja lokahönd á að allt sé fínt og flott hérna. Við fengum aðstöðuna afhenta í janúar og höfum verið í miklum framkvæmdum síðan þá. Það er loksins núna sem er komin lokamynd á þetta. Ég er gríðarlega stoltur af þessari glæsilegu aðstöðu en við erum með mikið úrval af flottum tækjum frá Rogue ásamt úrvali af aflraunatækjum. Ég hlakka mikið til að taka á móti gömlum meðlimum sem og nýjum og sýna þeim stöðina.“