„Lagið er á íslensku, en ég hef ekki gefið út á íslensku lengi. Lagið er hresst og jákvætt, svona „feel good“ lag um dætur mínar,“ segir tónlistarmaðurinn Beggi Smári um nýja lagið sitt, Brostu. Beggi á tvær dætur, Hebu, átján ára og Hrönn, tíu ára.

„Lagið var samið þegar ég var á tónleikaferðalagi og saknaði þeirra. Eina og ég geri alltaf þegar ég er ekki með þeim. Í laginu ímynda ég mér að ég væri ekki án þeirra,“ segir Beggi.

Myndbandið við lagið má sjá hér fyrir neðan en gaman er að segja frá því að yngri dóttir Begga, hún Hrönn, bjó til myndbandið. Það var hugmynd Hrannar að taka myndbandið upp og þykir stoltum föðurnum vænt um það.

„Ég spurði hana eftir á hvað hún vildi að launum og hún stakk upp á að eignast Titanic á DVD, sem er uppáhaldsmyndin hennar,“ segir Beggi og bætir við að Hrönn sé upprennandi kvikmyndagerðarkona. „Svo spáir hún í tökum og vinklum hjá James Cameron,“ en sá leikstýrði Titanic.

Hér fyrir neðan má horfa á myndband við lagið en einnig má hlýða á það á Spotify.