Krummi hefur verið iðinn við kolann síðustu ár í tónlistinni en hann steig fyrst fram á sjónarsviðið með hljómsveitinni Mínus. Eftir það lá leiðin til hljómsveitarinnar Legend, en einnig hefur hann unnið með fólki á borð við Daníel Ágúst úr GusGus í hljómsveit sem kallast Esja og nú nýverið með kærustu sinni, Linnea Hellström, og Frosta Gringo í bandinu Döpur.

Krummi hefur nú snúið sér alfarið að eigin efni en í haust sendir hann frá sér sína fyrstu sólóplötu í gegnum Öldu Music. Fyrsta lagið sem hann kynnir til leiks nefnist Stories To Tell og er samsuða af kántrí, blús, folk, rokki og róli. Sjálfur segist Krummi þrá að finna innri ró og platan sé tilraun til þess.

„Þetta lag fjallar um að trúa á eigin getu og skoða vandlega það viðhorf sem maður hefur til sjálfs sín og þess sem maður gerir og hvernig það hefur áhrif líðan og hegðun. Með laginu langar mig að opna mig fyrir þessu góða í lífinu og upplifa innri ró. Leyfa frjálsu flæði lífsins að vera við stjórnvölinn og skrifa mínar eigin lífsins sögur. Þiggja og hafna án eftirsjár. Vatn er líf og lífið er lyf. Hvort það sé gott eða slæmt lyf er undir okkur komið.“