Undanfarna daga hafa tuttugu þúsund keppendur frá sextíu og tveimur löndum tekið þátt í heimsmeistaramótinu í dansi í Braga, Portúgal. Mótið er eitt það stærsta og fjölbreyttasta sem haldið er fyrir börn og ungmenni en þar er keppt í öllum dansflokkum, bæði fyrir einstaklinga og hópa. Þónokkrir Íslendingar tóku þátt í keppninni og hrepptu meðal annars ein gull-, þrjú silfur- og fjögur bronsverðlaun. Hópur frá Dansskóla Brynju Pétursdóttur hlaut fyrsta sætið fyrir Hipp Hopp í eldri hópa-flokki. Þá lenti Brynjar Dagur Albertsson í öðru sæti fyrir atriði sitt í flokki fyrir einstaklinga í Hipp Hopp. Aðrir dansarar sem náðu sæti í keppninni eru Guðrún Kara Ingudóttir, Hafdís Eyja Vésteinsdóttir, Edda Guðnadóttir, Ragnheiður Ugla Ocares Gautadóttir, Isabella Tara Antonsdóttir, Rut Rebekka Hjartardóttir, Eydís Gauja Eiríksdóttir og Marinó Máni Mabazza.