Í dag fer bókin Allt hold er hey eftir Þorgrím Þráinsson í verslanir. Í tilefni þess skrifaði Þorgrímur Facebook færslu þar sem hann segir frá tildrögum bókarinnar.

„Bókin mín Allt hold er hey, mín eina skáldsaga fyrir fullorðna, fer í verslanir í dag, fimmtudag. Ég gaf hana út sjálfur árið 2004 en bókin hefur verið ófáanleg í 15 ár. Eins og fram kemur á bakhliðinni fékk ég símtal frá ókunnugri konu árið 1992 sem ég heimsótti kvöldi síðar. Hún sagðist reglulega fá heimsókn frá konu sem sagðist ekki fá frið í sálinni fyrr einhver skrifaði sögu hennar. Konan hafði þá verið látin í rúm 200 ár,“

skrifar Þorgrímur.

„Þegar ég skrifaði bókina gat ég nánast spjallað við persónurnar, beðið þær um að tala hærra og skýrar og þess vegna upplifði ég skrifin sem bíómynd. Það tók verulega á að skrifa söguna því þetta er baráttusaga íslenskrar alþýðukonu sem upplifði miklar hörmungar.

Ástæða þess að Forlagið ákvað að gefa bókina út í kilju er sú að hún hefur LIFAÐ, verið mikið lesin í bókaklúbbum og ,,saumaklúbbum“ og ég hef fengið fjölda símtala um verkið; hvort ég geti reddað eintaki.

Súsanna Svavarsdóttir ritstýrði bókinni meistaralega á sínum tíma. Og myndin á bakliðinni er af mér….. örlítið yngri en í dag!“