Hin sex ára gamla YouTube-stjarna „Boram“ frá Suður-Kóreu er með rúmlega 30 milljónir fylgjenda og það skilar sér greinilega vel í kassann. Að minnsta kosti keypti hún nýlega fimm hæða hús í Seoul og kostaði það sem nemur um einum milljarði íslenskra króna.

Húsið var keypt í gegnum fjölskyldufyrirtækið sem móðir hennar og faðir hafa stofnað í kringum YouTube vinsældir Boram. CNN skýrir frá þessu.

Boram er með tvær vinsælar rásir á YouTube. Á annarri kynnir hún og gagnrýnir leikföng fyrir 13 milljónum fylgjenda sinna. Á hinni rásinni, sem er með yfir 17 milljónir fylgjenda, er hún með vídeóblogg.

Boram er ekki eina barnið sem hefur náð miklum árangri á YouTube. Samkvæmt samantekt Forbes var hæstlaunaði YouTube-notandinn á síðasta ári aðeins 7 ára. það er Ryan Kaji sem hafði um 22 milljónir dollara upp úr krafsinu á myndböndum sínum á YouTube.

Barnastjörnunar þéna peninga með því að hafa auglýsingar í myndböndum sínum og með því að gera samstarfssamninga við vörumerki sem þær kynna í myndböndunum.