„Það er eitthvað fallegt við að gera svona skúlptúr og vita að hann snertir hjörtu fólks,“ segir Margrét Marísdóttir, sem býr til óvenjulega gæludýraskúlptúra, sem og handgerðar  lyklakippur og dýr á segul. Þjónustan er ekki síst ætluð fyrir fólk sem hefur misst gæludýr sín og getur minnst þeirra með því að eiga af þeim styttu eða jafnvel eftirmynd í formi lyklakippu. Verkin vinnur Margrét eftir ljósmyndum af dýrunum.

„Ég hef gert fyrir nokkra sem eiga hund sem er á lífi en hef gert meira af hundum sem eru farnir í sumarlandið og fólk hefur talað um að þetta hjálpi við að takast á við missinn af besta vininum,“

segir Margrét.

Stytturnar, lyklakippurnar og seglamyndirnar eru því ýmist af lifandi dýrum eða dauðum og þau dýr sem ekki eru í tölu lifenda eru fleiri. Það er óneitanlega magnað til þess að vita að verkin eru ekki bara af einhverjum dýrum heldur dýrum sem hafa lifað og verið vinir fólks.

Meiri upplýsingar og fleiri myndir er að finna á Facebook-síðunni Art by MLM.