River, þriggja ára sonur kántrísöngvarans Granger Smith og eiginkonu hans, Amber Smith, er látinn. Þetta tilkynnir Granger á Instagram-síðu sinni.
„Ég þarf að færa ykkur óhugsandi fréttir,“ skrifar hann við mynd af þeim feðgum. „Við höfum misst yngsta son okkar, River Kelly Smith. Það tókst ekki að lífga hann við eftir hræðilegt slys, þrátt fyrir að læknar reyndu sitt besta. Amber og ég höfum tekið þá ákvörðun að kveðja hann í hinsta sinn og gefa líffæri hans svo önnur börn fái annað tækifæri í lífinu. Fjölskylda okkar er í rusli og hjörtu okkar brostin en við finnum huggun í því að við vitum að hann er hjá Guði.“
Ekki er ljóst hvers konar slysi River lenti í, en Granger segir á Instagram að þetta sé klárlega það erfiðasta sem fjölskyldan hefur gengið í gegnum.
„Riv var sérstakur. Það vissu allir strax sem hittu hann. Það er ekki hægt að lýsa gleðinni sem hann færði okkur og ljós hans verður að eilífu í hjörtum okkar. Ég get ekki fundið fleiri orð núna. Elskið þá sem standa ykkur nærri. Við höfum aldrei gengið í gegnum jafn erfiða tíma.“
Granger og Amber gengu í það heilaga árið 2010 og eignuðust dótturina London einu ári síðar. Dóttirin Lincoln kom síðan í heiminn árið 2014 og River tveimur árum síðar.
