Embla Ósk Ásgeirsdóttir hefur verið vegan í tæplega tvö ár. Veganismi er henni hjartans mál og heldur hún úti Instagram-síðunni @embla_osk þar sem hún breiðir út boðskap um lífsstílinn.
Hún er nýjasti gestur Föstudagsþáttarins Fókus. Í þættinum ræðir Embla um veganisma og fer ásamt þáttastjórnanda yfir ráð til nýrra grænkera og þeirra sem vilja taka fyrstu skrefin.
Sjá einnig: Sex ráð til nýrra grænkera: „Gefðu þér breik“
Embla Ósk rifjar upp þegar hún varð fyrst vegan en það eru komin tæplega tvö ár síðan.
„Ég varð vegan fyrir tæpum tveimur árum. Ég held það hafi verið 1. júlí, minnir mig. Ég varð vegan því ég loksins ákvað að taka þessa ákvörðun. Ég hafði hætt að borða kjöt og fisk í eit tog hálft ár fyrir. Litlu systir minni langaði svo að verða vegan og ég var búin að bíða með að horfast í augu við þetta. Ég reyndi að taka út mjólkurvörur en fannst það erfitt,“ segir Embla og bætir við að það sem hún átti erfiðast með að segja skilið við var AB-mjólkin sem hún fékk sér í morgunmat.
„Mér fannst það bara svo geðveikt gott. Ég smakkaði soja jógúrt og fannst það vont og hætti þá bara að reyna.“
Embla segir að til þess að taka lokaskrefið í átt að veganisma hafi hún þurft að kynna sér almennilega aðstæður dýranna. „Ég þurfti alveg að skoða mjólkuriðnaðinn. Fá að vita af hverju ég ætti að verða vegan. […] Ég man daginn sem ég ákvað þetta hvað ég var ánægð,“ segir Embla.
„Ég var ekkert að kynna mér þetta. Ég vissi að það væri rangt að borða kjöt, en það er líka svo augljóst þegar þú ert með kjöt fyrir framan þig. Þá ertu bara með dauðan líkamspart fyrir framan þig og sérð svo augljóslega að þetta er dauði og morð. En þegar þú ert með mjólk þá er þetta afurð og það er erfiðara að tengja við það ef þú kynnir þér ekki hvaðan hún kemur.“
Embla segir að ferlið að verða vegan hafi tekið eitt og hálft ár og hún tók fiskinn síðast út úr mataræðinu.
Horfðu á Föstudagsþáttinn Fókus hér að neðan.
Föstudagsþátturinn Fókus – Veganismi, þáttur 2, Embla Ósk – 31.05.19 from DV Sjónvarp on Vimeo.