Alexandra Briem varaborgarfulltrúi mun leggjast undir hnífinn í dag. Hún er stödd um þessar mundir í borginni Marbella á Spáni til að fara í andlitsaðgerð. Samkvæmt myndbandi sem Alexandra deildi á Instagram í gærkvöldi fer hún í aðgerðina í dag.
„Það er bara síðasta færslan hjá mér áður en ég fer í aðgerðina. Það eru sirka 11 tímar að ég fari í hana,“ segir Alexandra, en færslan birtist fyrir fimmtán tímum síðan. Það er þá hægt að álykta að Alexandra sé nýbúin í aðgerðinni þegar þessi grein er skrifuð.
„Ég er orðin mjög spennt og farin að hlakka rosalega mikið til. Ég vona að ég geti sofnað í kvöld því ég svolítið stressuð líka,“ segir Alexandra.
Í samtali við Fréttablaðið fimmtudaginn síðastliðinn sagði hún andlitsaðgerðina vera mikilvæga fyrir sjálfsvitund sína.
„Þú vilt sýna umheiminum manneskjuna sem þú upplifir að þú sért,“ sagði Alexandra við Fréttablaðið.
Í aðgerðinni verður gerð breyting á ennisbeini, hárlínu og efri vör Alexöndru.