Rapparinn Herra Hnetusmjör bætti glænýju húðflúri í safnið í vikunni hjá húðflúrmeistaranum Chip Baskin á stofunni Reykjavík Ink. Rapparinn valdi sér táknrænt flúr af Lady Justice, eða réttlætisgyðjunni, á vinstri handlegg, en auk þess að vera notað yfir kvenkyns dómara í Bandaríkjunum, er gyðjan sterkt tákn réttlætis. Styttur af réttlætisgyðjunni er að finna fyrir utan fjölmörg dómshús víðs vegar um heim, þar á meðal hæstaréttinn í Kanada og við inngang hæstaréttarins í Róm á Ítalíu. Þá er gyðjan vinsælt viðfangsefni í myndlist og dægurmenningu og prýddi til að mynda plötuumslag And Justice For All með Metallica.
Ýmsar útgáfur eru til af gyðjunni en herrann ákvað að fá sér gyðjuna þar sem hún heldur bæði á sverði og vog með bundið fyrir augun. Allir eiga að vera jafnir fyrir lögum og því á gyðjan ekki að sjá neitt, sverðið táknar hefnd réttlætis og vogin táknar að allir eiga að fá það sem þeir eiga skilið, hvorki minna né meira. Réttlætisgyðjan bætist í hóp fjölmargra húðflúra rapparans, en hann er til að mynda með hjarta og áletrunina Mamma á hægri framhandlegg, póstnúmerið 203 við hægri úlnlið og einkennisorð sín Kóp Boi yfir sig miðjan.