Rúmlega tuttugu þúsund manns hafa skrifað undir áskorun þess efnis að efnisveitan Netflix taki nýlega þætti, sem fengið hafa býsna góða dóma, úr sýningu. Það er bara einn galli á þessari kröfu: Netflix kom hvergi nærri framleiðslu þáttanna og sýnir þá ekki einu sinni.
Þættirnir sem um ræðir heita Good Omens og eru einskonar blanda af kómedíu og fantasíu. Það er David Tennant sem fer með aðalhlutverkið en auk hans leika Michael Sheen og Frances McDormand í þáttunum. Þættirnir eru byggðir á sögu Terry Pratchett og Neil Gaiman sem kom út árið 1990.
Það eru Amazon Studios og BBC Studios sem framleiddu þættina og eru þeir sýndir á efnisveitu Amazon, Amazon Prime. „Ég elska að verið sé að skora á Netflix að hætta að sýna þættina. Segir allt sem segja þarf,“ sagði Gaiman um málið á Twitter-síðu sinni.
Það er hópur sem kallast sig Return to Order sem stendur fyrir undirskriftarsöfnuninni, en meðlimir hópsins eru kristnir og strangtrúaðir. Vilja þeir meina að í þáttunum sé satanismi sýndur í jákvæðu ljósi og hann í raun sagður eðlilegur. Þá er fundið að því að kona, Frances McDormand í þessu tilviki, sé fengin til að ljá Guð rödd sína.
Good Omens hafa sem fyrr segir fengið fína dóma en um er að ræða sex þátta seríu. Eru þættirnir með einkunnina 8,4 á IMDB.com og 83/100 á Rotten Tomatoes.