Tónlistarkonan Þórunn Antonía Magnúsdóttir er flutt í einbýlishús í Hveragerði, en Þórunn leyfði fylgjendum sínum á Instagram að fylgjast vel með flutningunum um síðustu helgi. Þórunn hefur síðustu ár hreiðrað um sig í snoturri íbúð í miðbæ Reykjavíkur en er þó ekki ókunnug í Hveragerði þar sem faðir hennar, tónlistarmaðurinn Magnús Þór Sigmundsson og eiginkona hans Jenný Borgedóttir leikskólakennari, hafa búið sér til fallegt heimili þar undanfarin ár. Þórunn er gengin 33 vikur með sitt annað barn og náði að koma sér fyrir í húsinu í Hveragerði á mettíma.
Hins vegar fékk Þórunn frekar kuldalega innflutningsgjöf þegar hún var búin að hreiðra um sig í blómabænum. Plágan sem hefur breitt úr sér í Hveragerði, sjálft lúsmýið margfræga, tók á móti Þórunni og lét til skarar skríða með tilheyrandi bitum, kláða og óþægindum. Var Þórunn svo illa farin af bitum að hún þurfti að leita sér læknisþjónustu seint um kvöld í hinum nýja heimabæ sínum til að fá bót sinna meina. Þórunn náði sér samt fljótlega aftur á strik og hélt kyrru fyrir í kjölfar læknisheimsóknarinnar. Alþekkt er að óléttar konur eigi að forðast sterk lyf og því vont að lenda í þessum vágesti svo seint á meðgöngunni.
Lúsmýið, þessar örsmáu flugur sem bíta allt sem fyrirfinnst, virðast einkar hrifnar af tónlistarmönnum. Áður hafa verið sagðar af því fréttir að tónlistarmennirnir Karl Tómasson og Bubbi Morthens, sem búa báðir við Meðafellsvatn, hafi kvartað undan bitum flugunnar. Stóra spurning er þá: Hvaða tónlistarmaður verður næst fyrir barðinu á lúsmýinu ógurlega?