Alicia Jessop, prófessor við Pepperdine University í Kaliforníu í Bandaríkjunum, hafði lengi dreymt um að heimsækja New England á norðausturhorni Bandaríkjanna.
Hún lét verða af því á dögunum og á föstudag fór hún í skoðunarferð við ströndina þar sem hún skoðaði meðal annars gamlan vita. Hún keypti sér líka gómsæta humarsamloku og hugðist taka hina fullkomnu matarmynd – rétt eins og Instagram-stjörnurnar gera.
Í samtali við AP-fréttastofuna segir Alicia að hún hafi verið með höndina útrétta meðan hún stillti myndavélina á símanum. Það tók hana um tuttugu sekúndur. Það sem Alicia vissi ekki var að máfur sem var á sveimi fyrir ofan hana hafði komið auga á samlokuna og hugsaði sér gott til glóðarinnar.
Á sama augnabliki og Alicia smellti af kom máfurinn aðvífandi og tók góðan bita af samlokunni.
Það er skemmst frá því að segja að Alicia leyfði máfinum – og „vinum hans“ eins og hún orðar það – að borða samlokuna. Alicia birti myndina á Twitter og er óhætt að segja að hún hafi vakið mikla lukku.
