Kvikmyndin The Nightingale er væntanleg í kvikmyndahús víða, en umrædd mynd var sýnd á kvikmyndahátíð í Sydney í Ástralíu um helgina þar sem hann fékk blendin viðbrögð.
Myndin gerist árið 1825 og segir frá ungri írskri konu, Clare að nafni, sem búsett er á Tasmaníu undan ströndum Ástralíu. Til að gera langa sögu stutta er Clare í hefndarhug vegna bresks manns sem búsettur er á eyjunni, en sá beitti Clare og aðra úr fjölskyldu hennar skelfilegu ofbeldi.
Það er Jennifer Kent sem leikstýrir myndinni en hún er einna best þekkt fyrir að hafa leikstýrt hryllingsmyndinni The Babadook sem kom út árið 2014. Sú mynd hlaut einróma lof gagnrýnenda og er að margra mati ein besta hryllingsmynd síðustu ára.
En viðfangsefni The Nightingale er annars konar hryllingur en í The Babadook, ef svo má að orði komast. Gróf ofbeldisatriði, nauðganir til að mynda, hafa helst farið fyrir brjóstið á áhorfendum. Í frétt News.com. au kemur fram að margir hafi fengið nóg á frumsýningunni um helgina og gengið út.
Jennifer hefur svarað þessari gagnrýni á þá leið að ofbeldi sé ekki viðfangsefni eða rauði þráður myndarinnar. Myndin varpi þó ákveðnu ljósi á ofbeldið sem viðgekkst á nýlendutímanum, þá sérstaklega í garð innfæddra. Skilaboðin sem myndin sendir séu hins vegar skilaboð um von og ást á erfiðum tímum.
Myndin hefur hlotið ágætis dóma hjá gagnrýnendum. Þannig gefur gagnrýnandi Variety myndinni einkunnina 9 af 10 mögulegum. Það sama gerir gagnrýnandi Los Angeles Times. Gagnrýnendur The Guardian og The Hollywood Reporter eru ekki jafn hrifnir og gefa myndinni einkunnina 6 af 10.