Grínarinn og framleiðandinn Will Ferrell fer með hlutverk Íslendings í kvikmyndinni Eurovision, en sú mynd – líkt og nafnið gefur til kynna – fjallar um söngvakeppnina stórvinsælu og herlegheitin í kringum hana.
Í myndinni leikur grínarinn íslenskan söngvara og á móti honum fer Rachel McAdams með hlutverk íslenskrar söngkonu. Gísli Marteinn Baldursson segir á Twitter að Ferrell hafi staðfest þetta á sviði Expo-hallarinnar í Tel Aviv skömmu áður en dómararennslið hófst.
Will Ferrell er á sviðinu hérna núna, rétt fyrir dómararennslið og var að segja áhorfendum í salnum að hann leiki söngvara Íslands í Netflix myndinni hans um Eurovision. Það verður athyglisvert. #12stig
— Gísli Marteinn (@gislimarteinn) May 17, 2019
Tökur á myndinni eru í fullum gangi þessa dagana í Ísrael og er engin tilviljun að Ferrell skjóti upp kollinum í beinni þetta árið, en hann var einnig áberandi á keppninni í Portúgal í fyrra.
Það eru risarnir hjá Netflix sem munu sjá um að framleiða myndina og verður þetta fyrsta samstarfsverkefni grínarans við streymiveituna. Ferrell skrifar handritið að myndinni ásamt Andrew Steele en þeir kumpánar hafa reglulega unnið saman síðan á dögum Ferrells hjá grínþættinum Saturday Night Live. Skrifuðu þeir einnig saman kvikmyndina Casa de mi Padre.
Leikstjórinn David Dobkin situr við stjórvölinn en hann á að baki kvikmyndirnar Wedding Crashers, Fred Klaus og Shanghai Knights, svo dæmi séu nefnd.
Eurovision er væntanleg á Netflix í vetur.