Brynjari Níelssyni, þingmanni Sjálfstæðisflokksins, mislíkaði eitthvað málflutningur þingmanns Pírata, Halldóru Mogensen, um kjaramál á Alþingi í gær. Þetta má lesa úr svipbrigðum hans á meðan á ræðu hennar stóð.

Halldóra tók til máls í sérstakri umræðu um kjaramál á Alþingi í gær. Þar sem hún gagnrýndi meðal annars sinnuleysi ríkisstjórnarinnar í kjaramálum, kynbundinn launamun og stöðu þeirra sem eru á lægstu laununum.

„Ef allur þingheimur yrði dreginn hér upp í pontu  og látinn svara spurningunni : „Vil þú tryggja vinnandi fólki kjör sem leyfir þeim að lifa með reisn?“ Væri svarið án efa hjá öllum okkar eindregið jákvætt. Loforð um mannsæmandi laun og aukna velmegun hljóma hér reglulega. En svo gerist næstum ekki neitt.“

Eitthvað virðist Brynjari hafa mislíkað það sem kom næst í ræðu Halldóru því á meðan hún sagði: „Sá fimmtungur þjóðarinnar sem minnst hefur milli handanna hefur ekkert grætt á hagvaxtaraukningu, kaupmáttaraukningu og öllum þeim fjöl mörgu meðaltölum sem mæla hagkerfi, en ekki hagsæld og hamingju,“ þá ranghvoldi Brynjar í sér augunum, með áberandi hætti. Halldóra lauk ræðu sinni á því að hvetja til þess að í stað þess að stara á hagvöxt og meðaltal launa verði meira horft til leiða til að bæta líðan landsmanna og auka hamingju. En því væri hægt á ná fram með aðgerðum á borð við að stytta vinnuvikuna. Rannsóknir hafi sýnt fram á að styttri vinnuvika auki hamingju, haldið fjölskyldum saman, aukið heilsu og haft jákvæð áhrif á umhverfið.

„Loforð ríkisstjórnarinnar um aukin jöfnuð hafa ekki skilað sér til þeirra sem bjuggu við fátækt og skort fyrir loforðið. Staða þeirra er óbreytt að mestu nema fyrir þær kjarabætur sem verkalýðshreyfingin hefur tryggt þeim með harðri kjarabaráttu sinni. […]. Stefnum ekki að sívaxandi hagvexti og að hækka sem allra mest meðaltal launa, stefnum að því að búa hér til  fjölskylduvænt samfélag sem setur lífshamingju og vellíðan landsmanna í fyrsta sæti.“

Blaðamaður Viðskiptablaðsins, Jóhann Óli Eiðsson, deildi svo þessu skemmtilega myndbroti á Twitters-síðu sinni af svipbrigðum Brynjars frá í gær.

HM: Sá fimmtungur þjóðarinnar sem minnst hefur á milli handanna hefur ekkert grætt á hagvaxtaraukningu, kaupmáttaraukningu og öllum þeim fjölmörgu meðaltölum sem mæla hagkerfi.@BrynjarNielsson pic.twitter.com/whLLMQ1VGy

— Jóhann Óli Eiðsson (@jedissson) May 14, 2019