Skoski listamaðurinn Portis Wasp er þekktur fyrir að blanda saman mismunandi miðlum í list sinni og hefur meðal annars unnið fyrir tískurisa á borð við Diesel og Moschino og tímaritin Harper‘s Bazaar, i-D og Vogue.
Portis stundar það að taka frægar myndir úr dægurmenningu og setja þær í framandi aðstæður, bæðir í hreyfi- og stillimyndum, en nýjasta verkefni hans er einstaklega áhugavert fyrir okkur Íslendinga. Verkefnið, sem heitir Fucking With Nature, eða Hamast í náttúrunni, er fólgið í því að blanda myndum úr hommaklámi saman við íslenska náttúru.
Portis ferðaðist nýverið til Vestfjarða og tók alls kyns náttúrulífsmyndir. Nú hefur hann klippt fáklædda karlmenn í munúðarfullum stellingum saman við mosa, grjót og vatn og nær íslenska náttúran að hylja það allra heilagasta.
Hægt er að skoða fleiri verk eftir Portis á Instagram-síðu hans.