Kryddpían Melanie Brown, oftast kölluð Mel B, hefur sett glæsihýsi sitt í Hollywood aftur á sölu og biður nú um 5,9 milljónir dollara fyrir slotið, eða rúmar sjö hundruð milljónir króna.
Melanie keypti húsið með fyrrverandi eiginmanni sínum, Stephen Belafonte, árið 2014. Þau tóku húsið allt í gegn árið 2016 og settu það fyrst á sölu árið 2017 í kjölfar skilnaðar. Þá vildu þau níu milljónir dollara fyrir húsið, eða rúman milljarð króna.
Húsið er glæsilegt í alla staði og búið sundlaug, stórum garði og eldhúsi undir berum himni. Þá er góð lofthæð og hægt að fjarstýra öllu húsinu – allt frá tónlist til öryggiskerfis.