Bandaríska leikkonan Roseanne Barr hefur verið á vörum margra eftir að hún birti myndbönd á YouTube um helgina en þar sagðist hún meðal annars vera komin út úr skápnum. Það sem vakti sérstaklega athygli við þetta var að leikkonan fjarlægði játningu sína skömmu eftir birtingu, en í myndbandinu segir hún:
„Ég set „Q-ið“ í LGBTQ. Ég er hinsegin, ég er aðkomumanneskja. Ég á mér engan sess með öllu þessu fólki. Það passar ekki alveg saman. Þau eru afar hinsegin og það gerir mig hinsegin, býst ég við.“
Játningin fylgdi eftir umræðu leikkonunnar um orðið „faggi“ og hvernig nýting þess hefur verið hatursfull og meira til að hennar sögn. „Þetta er sérstaklega ógeðslegt þegar samkynhneigður maður segir þetta við einhvern annan samkynhneigðan mann.“
Ekki er enn vitað hvers vegna leikkonan fjarlægði myndböndin, sem voru tíu talsins, en ummæli hennar fóru fyrir brjóstið á ófáum netverjum. Slíku er þó Barr ekki óvön enda ekki þekkt fyrir að liggja á skoðunum sínum. Hún vakti mikla athygli í fyrrasumar þegar hún birti færslu á Twitter-aðgangi sínum sem þótti sýna mikla kynþáttafordóma í garð Valerie Jarret, fyrrum aðstoðarkonu Baracks Obama. Í kjölfar umtalsins ákvað sjónvarpsstöðin ABC að hætta framleiðslu þáttanna Roseanne, sem voru endurvaktir veturinn 2017. Roseanne, sem er yfirlýstur stuðningsmaður Trumps, sá að sér vegna færslunnar, en það dugði ekki til að sjónvarpsstöðin afturkallaði þá ákvörðun að aflýsa framleiðslu þáttanna.
Í vor skapaði leikkonan mikinn usla þegar hún lét ummæli falla í garð #MeToo byltingarinnar. Sagði hún þá að margar konurnar á bak við hreyfinguna hafi verið fullmeðvitaðar um að þær voru að bjóða fram kynferðislega greiða í skiptum fyrir peninga eða atvinnu. „Ég þekki hórur þegar ég sé þær,“ sagði hún. „Sumar þessara kvenna voru þarna staddar á hótelherbergi um miðja nótt vegna þess að þær héldu að þær fengju vinnu fyrir fimmtán árum síðan. En ef þú hleypur ekki út úr herberginu strax og segir: „Afsakið, þú gerir ekki svona við mig“ og lætur þig hverfa, þá ertu einfaldlega bara hóra. Konurnar eru brjálaðar vegna þess að þær voru ekki hrifnar af manninum sem gerði þetta.“