„Það er ekki alveg áhættulaust að fara í varafyllingu,“ segir lýtalæknirinn Ágúst Birgisson í samtali við DV um heitustu tískubylgjuna er kemur að útlit og fegurð – þrýstnum vörum. Áður fyrr voru það eingöngu hinir ríku og frægu sem leituðu á náðir lýtalækna vegna slíkra aðgerða en nú eru varafyllingar orðnar afar algengar hjá fólki á öllum aldri, í öllum þjóðfélagshópum.
„Fyrst og fremst getur verið mar eða blæðing, það getur verið ofnæmi fyrir efninu með bólgu sem er þrálát og erfitt að eiga við. Svo getur verið blóðþurrð ef það lokast æð í kring. Þetta er ekki áhættulaus aðgerð,“ segir Ágúst. „Kannski algengasta áhættan er að það er einhver ójafna sem er þá hægt að laga. Það er hægt að laga með því að setja lyf sem leysir upp fylliefnið ef maður er óánægður með þetta og náð því niður þannig,“ bætir hann við.
Nánar er rætt við Ágúst um varafyllingar neðst í þessari grein, en fyrst skulum við líta á nokkra þjóðþekkta Íslendinga sem hafa tekið virkan þátt í að skapa þennan sterka tískustraum.
Manuela Ósk hefur talað opinberlega um varafyllingar síðan 2017. Hún talaði mjög opinskátt um þær á Snapchat í ágúst 2017 og sagði fylgjendum sínum frá afslætti sem þeir gætu fengið af slíkri meðferð. Umræðan vakti mikla athygli og var harðlega gagnrýnd. Manuela Ósk er með yfir 51 þúsund fylgjendur á Instagram.
Tanja Ýr hefur ekki opinberlega talað um að hún fylli í varirnar á sér og því er ekki hægt að slá því föstu. Varir hennar hafa þó óneitanlega orðið þrýstnari með árunum. Hún er með rúmlega 32 þúsund fylgjendur á Instagram.
Jóhanna er líklega þekktust fyrir að vera besta vinkona Sunnevu Einars. Út frá myndum hennar að dæma mætti ætla að hún fylli í varir sínar, en DV hefur þó enga staðfestingu þess efnis. Hún er með rúmlega 11 þúsund fylgjendur á Instagram.
Sunneva Einars er með rúmlega 41 þúsund fylgjendur á Instagram. Hún hefur ekki tjáð sig opinberlega um varafyllingarnar.
Alda Coco er glamúrfyrirsæta og talar mjög opinskátt um varafyllingar. Alda kom nýlega í Föstudagsþáttinn Fókus, hlaðvarpsþátt dægurmáladeildar DV, og ræddi um þær fegrunaraðgerðir sem hún hefur gengist undir. Hún er með rúmlega 19 þúsund fylgjendur á Instagram.
Varir Þórunnar Antoníu hafa orðið meiri um sig síðustu misseri, en óljóst er hvort varafyllingum sé að þakka. Söngkonan er með tæplega átta þúsund fylgjendur á Instagram.
Ásdís Rán hefur talað opinskátt um að hún fylli í varirnar sínar í mörg ár. Glamúrfyrirsætan er með tæplega níu þúsund fylgjendur á Instagram.
Viktor Andersen er ekki feiminn um þær fegrunaraðgerðir sem hann hefur gengist undir. Hann var gestur Föstudagsþáttarins Fókus ásamt Öldu Coco og ræddi opinskátt um fegrunaraðgerðir. Hann hefur einnig komið fram í Ísland í dag til að ræða sama málefni.
Hafa varafyllingar aukist upp á síðkastið?
„Síðustu tvö-þrjú ár hefur þetta verið að aukast.“
Einhver sérstök ástæða fyrir því?
„Ætli þetta séu ekki tísku trendið í dag.“
Eru þetta sérstakir aldurshópar sem vilja fylla í varirnar?
„Þetta eru að mínu mati tveir hópar. Annars vegar eru það ungu konurnar. Ég segi konur, þetta eru mest konur en það eru einnig líka karlar í þessu. Og sama finnst mér gilda um seinni hópinn, sem er aðeins eldri. Þá finnst þeim varirnar farnar að þynnast og vilja fá aftur hið fyllta útlit.“
Hver er munurinn á varanlegum og tímabundnum fyllingum?
„Ég vil helst ekki nota [varanlegar fyllingar]. Það er töluvert mikil áhætta við þær. Ég hef haldið mig við hinar sem leysast upp og er minni áhætta við að nota.“