Fyrirsætan Alda Guðrún Jónasdóttir, betur þekkt sem Alda Coco, er komin í úrslit í fyrirsætukeppni á vegum Jet Set Magazine, en aðeins eru nokkrir klukkutímar eftir af kosningunni.
Alda telur illa að sér vegið, eins og hún segir frá í sögu sinni á Instagram, og finnst miður að konurnar sem eru efstar í keppninni stundi það að kaupa atkvæði. Hægt er að kjósa einu sinni á dag frítt en síðan er hægt að kaupa atkvæði, en peningurinn rennur til góðgerðarmála.
„Þetta er fjandans barátta,“ skrifar Alda í sögu sína. „Hvernig er hægt að keppa við stelpur sem kaupa atkvæði?“ bætir hún við. Í færslu á Instagram segist hún jafnframt vera stolt af sér sjálfri að ná svona langt.
„Þetta hefur verið stórkostleg ferð og ég sigraði í mínum flokki í undanúrslitum. Ég komst í topp hundrað. 25 þúsund konur alls staðar að úr heiminum hófu keppni og nú eru hundrað eftir,“ segir hún. „Fyrir mér er ég sigurvegari. Ég er mjög stolt að kaupa mér ekki sigurinn,“ bætir hún við og biður fólk um að kjósa þar til kosningu lýkur.
„Og takk fyrir allan stuðninginn.“