Áhrifavaldurinn Sólrún Diego er í London þessa dagana með vinkonum sínum, Camillu Rut, Línu Birgittu og Gurrý Jóns. Tilgangur ferðarinnar er brúðarkjólamátun en Sólrún gengur að eiga sinn heittelskaða, Frans Veigar Garðarsson, í sumar.
Sjá einnig: Allt sem við vitum um brúðkaup Sólrúnar Diego.
Sólrún og vinkonur hennar sýndu frá brúðarkjólamátuninni á Instagram í gær en þær heimsóttu glæsilegu brúðarkjólabúðina Grace Loves Lace í London.
Má með sanni segja að Sólrún hafi geislað í hvítum blúndukjól úr versluninni með æðislegt slör.
Vinkonuhópurinn virtist skemmta sér konunglega í versluninni með kampavín í hönd og jafnvel mátti greina nokkur tár á hvarmi yfir fegurð brúðarinnar.
Virðist Sólrún hafa fallið fyrir kjól sem heitir Alexandra sem kostar rúmlega 2.200 Evrur, eða rétt rúmlega þrjú hundruð þúsund krónur.