Nú eru liðin tvö og hálft ár síðan að leikkonan Angelina Jolie sótti um skilnað við leikarann Brad Pitt eftir tveggja ára hjónaband. Nú heldur breska blaðið The Sun því fram að Angelina vilji ekki skilja heldur vilji Brad aftur, en enn á eftir að ganga formlega frá skilnaðarpappírunum.
„Angelina hefur gert Brad það ljóst að hún vilji byrja með honum aftur,“ segir ónefndur heimildarmaður í samtali við The Sun. Samkvæmt greininni er þetta ástæðan fyrir því að Angelina hefur dregið lappirnar í skilnaðardeilunni. Hún ku vilja draga málið á langinn svo Brad hugsanlega vilji stofna aftur til sambands.
„Hún vill að þau verði fjölskylda aftur og getur ekki haldið áfram með líf sitt,“ segir heimildarmaður The Sun. „Þess vegna gerir hún Brad svo erfitt að skilja.“
Þá er því einnig haldið fram að Brad vilji ekki byrja með Angelinu aftur en að hann vilji halda sambandinu vinalegu fyrir börnin. Börnin sem Brad og Angelina hafa alið upp saman eru sex talsins.
„Hann vill bara ganga frá þessu. Í raun og veru hefði verið hægt að ljúka þessu máli fyrir rúmlega ári en hún vill ekki sleppa.“
Angelina hefur sést mikið með börnunum, Maddox, 17 ára, Pax, 15 ára, Zahara, 14 ára, Shiloh, 12 ára og tvíburunum Knox og Vivienne, 10 ára. Brad heldur hins vegar tíma sínum með krökkunum út af fyrir sig og hefur ekki gefið ljósmyndurum færi á að mynda sig með þeim. Fjölmiðlar greindu frá því í nóvember á síðasta ári að þau hefðu náð sáttum hvað varðar forræði yfir börnunum.
Angelina og Brad kynntust við tökur á kvikmyndinni Mr. And Mrs. Smith árið 2005. Því hefur verið staðfastlega haldið fram að þau hafi fellt hugi saman við tökur á myndinni og er um að ræða einn mesta skandal Hollywood-sögunnar, þar sem Angelina er enn í dag sökuð um að rústa hjónabandi Brad Pitt og Jennifer Aniston, en þau skildu í október árið 2005. Angelina og Brad gengu í það heilaga árið 2014.