Athafnamaðurinn Jón Ásgeir Jóhannesson segist hafa tekið illa í skilnað foreldra hans, Ásu og Jóhannesar, á sínum tíma. Þetta kemur fram í ítarlegu viðtali við Sigmund Erni Rúnarsson á Hringbraut.
„Ég tók því nú ekkert vel. En ég held að börn geri það aldrei, á hvaða aldri sem þau eru. En þetta var þeirra ákvörðun. Þau unnu samt saman lengi eftir það.“
Voru þau vinir?
„Þau voru vinir já,“ svaraði Jón Ásgeir.
Þrátt fyrir allt?
„Þrátt fyrir allt. Kannski ekki fyrstu árin en svo jafnaði það sig.“
Sjálfur skildirðu líka, hversu erfitt var það?
„Það er erfitt,“ svaraði Jón Ásgeir. „Ég held að skilnaðir séu erfiðir, hvað sem fólk segir.“
Var það vegna þess að þú tókst vinnuna fram yfir allt?
„Þessi fyrstu Bónusár var vinnutíminn, ja, þú fórst svona sjö, átta, eða vaknaðir sjö og varst kominn heim um tíu leytið,“ svaraði Jón Ásgeir sem í mörg ár vann langt fram á kvöld. „Það var svona venjulegur dagur og síðan varstu að vinna um helgar líka, sjá um Bókhaldið, svona fyrstu árin.“
Eftir á að hyggja, fannst þér þú kannski missa af börnunum þínum?
„Já, það má alveg segja það. Það gerist,“ svaraði Jón Ásgeir.