Öll merki benda til þess að nýjasta myndin frá Marvel-færibandinu, Avengers: Endgame, verði þrír klukkutímar að lengd. Þetta staðfesta leikstjórar myndarinnar, bræðurnir Joe og Anthony Russo í samtali við Collider, og kemur þetta einnig fram á nýuppfærðri IMDb-síðu myndarinnar.
Lengd myndarinnar er þrír tímar og tvær mínútur, sem einhverjir bíógestir telja eflaust vera í lengri kantinum. Leikstjórar myndarinnar segja það þó nauðsynlegt að myndin sé löng í ljósi þess að myndin er lokahnykkur þeirra 22 kvikmynda sem á undan komu, en serían hófst árið 2008 með útgáfu fyrstu Iron Man myndarinnar.
„Það er mikið magn af sögum sem fara í myndina. Tilfinningar eru stór hluti af því fyrir okkur,“ segir Joe Russo, annar leikstjóri myndarinnar í samtali við Collider, og vill hann meina að það sé algjörlega þess virði að nýta þrjá tíma í söguna.
„Einmitt núna finnst okkur myndin vera að spilast afar vel og við höfum fengið góðar viðtökur frá prufu-áhorfendahópunum og okkur líður mjög vel með hvar þetta er statt.“
Þetta þýðir að Avengers: Endgame verði lengsta myndin í sögu Marvel-kvikmyndaversins en forveri myndarinnar, Infinity War, átti áður metið en sú mynd var tveir tímar og fjörutíu mínútur að lengd. Því er öruggt að fullyrða að aðdáendur myndabálksins eigi von á mikilli veislu þar sem aðgangseyririnn verður eflaust vel nýttur.
Avengers: Endgame verður frumsýnd þann 26. apríl. Stiklu fyrir myndina má sjá að neðan.