Tónlistarmaðurinn Valdimar Guðmundsson varð fyrir yfirtöku tölvuþrjóta. Á svonefndri „Like-síðu“ hljómsveitarinnar á Facebook blasti skyndilega við ókunnug kona og kom tónlistarmaðurinn alveg af fjöllum þegar hann sá ljósmyndirnar sem „huldukonan“ hafði hlaðið upp. Allt útlit var fyrir því að Valdimar hafi verið útskúfaður frá sinni eigin síðu og fæst engin skýring á málinu hjá stórveldi Marks Zuckerberg, en söngvarinn segir:
„Það er búið að hakka og stela Facebook-síðu hljómsveitarinnar Valdimar og við fáum engin svör frá Facebook.“
Þá var undir vinum Valdimars komið að tilkynna þessi nethryðjuverk til umsjónarmanna samfélagsmiðilsins, en nú lítur út fyrir að vefsíða hljómsveitarinnar hafi verið fjarlægð.
Hér má finna skjáskot af vefsíðunni og prófílnum sem yfirtók síðu hljómsveitarinnar.