Endurkoma kryddpíanna gæti verið í hættu eftir að Mel B ljóstraði því upp í sjónvarpsþættinum Life Stories með Piers Morgan að hún hefði stundað kynlíf með Geri Horner „Ginger Spice“ þegar að hljómsveitin var á hápunkti frægðarinnar. Greint er frá þessu á vef Daily Mail.
„Hún (Geri) á eftir að hata mig því hún er fín í sveitahúsinu sínu með eiginmanni sínum en þetta er staðreynd. Þetta gerðist bara og við flissuðum. Þar með var það búið. Hún var með geggjuð brjóst,“ sagði Mel B við Piers. Hann spurði þá hve oft þær hefðu sofið saman.
„Æi, hættu þessu pervertinn þinn,“ sagði Mel B og bætti við að þetta hefði aðeins gerst einu sinni.
„Hún á eftir að drepa mig og eiginmaður hennar líka,“ bætti hún við. „Vonandi neitar Geri þessu ekki þegar hún verður spurð því þetta var bara gaman.“
Ein önnur Kryddpía, Mel C, var í salnum og fengu þessar upplýsingar eilítið á hana. „Þetta er allt nýtt fyrir mér,“ sagði hún.
Geri hefur ekki enn tjáð sig um þessa opinberun, en dásamaði líkama Mel B í viðtali við fyrrnefndan Piers árið 2010.
„Hún er fjallmyndarleg, jafnvel fallegri í alvöru. Hún er með frábær brjóst og undursamlegan afturenda.“
The Sun greinir hins vegar frá því að Mel B hafi hringt í Geri strax eftir að tökum á þættinum Life Stories lauk og beðið hana afsökunar. Heldur fjölmiðillinn því fram að endurkoma Kryddpíanna, sem eru á leið á tónleikaferðalag, gæti verið í hættu vegna þessarar uppljóstrunar.