Áhrifavaldurinn og kjarnakonan Sunneva Einarsdóttir eyddi gærdeginum á húðflúrstofunni Reykjavík Ink í miðbæ Reykjavíkur þar sem hún skreytti líkamann með fallegum flúrum. Sunneva fór með bestu vinkonu sinni, Jóhönnu Helgu, sem fékk sér einnig flúr.
Flestir láta sér nægja að fá sér eitt flúr í einu en Sunneva fékk sér tvö sama daginn.
Hún fékk sér annars vegar snotran dreka á bakið og hins vegar stafina bby á aðra rasskinnina.
Hægt var að fylgjast með flúrstuði vinkvennanna á Instagram-síðu Reykjavík Ink, en það var húðflúrarinn VIK frá Edinborg sem sá um að skreyta stöllurnar.
Það má með sanni segja að þær Sunneva og Jóhanna hafi verið í góðum höndum á húðflúrstofunni Reykjavík Ink, en margir af þekktustu tónlistarmönnum landsins hafa fengið flúr þar, til dæmis Bubbi Morthens, Emmsjé Gauti og Herra Hnetusmjör.
Þá hefur söngkonan Þórunn Antonía einnig látið skreyta sig á stofunni sem og tónlistarmaðurinn Króli. Þeir sem eru í húðflúrshugleiðingum geta fengið innblástur með því að skoða heimasíðu stofunnar með því að smella hér.