Sonur Matt MacMillans, Ryan, hefur slegið í gegn á vefnum. Ryan fæddist níu vikum fyrir tímann og eyddi sex vikum á vökudeild. Því datt Matt í hug að nota myndvinnsluforritið Photoshop til að sýna fyrirburann litla í aðstæðum sem flestir geta verið sammála um að henti ekki ungabörnum.
„Ég og eiginkona mín erum með ákaflega góðan húmor svo okkur fannst virkilega gaman að standa í þessu. Við munum alltaf geta horft til baka á þetta verkefni með bros á vörum,“ sagði Matt í samtali við miðilinn Caters. „Mér þykja hefðbundnar ungbarna myndir frekar leiðinlegar, svo ég ákvað að krydda þær upp með þessum hætti.“
Matt segir uppáhalds myndina vera þá sem sýnir Ryan klæddan upp til að fara í vinnuna, en hana má sjá hér neðar. Hæfileikar hans í Photoshop eru miklir og myndirnar mjög raunverulegar, en sú staðreynd hefur valdið því að þau hjónin hafa hlotið mikið af reiðilegum athugasemdum frá fólki sem lýsa yfir áhyggjum af velferð barnsins því þau töldu myndirnar raunverulegar.
„Þau spyrja hvernig ég fái það af mér að setja barnið mitt í svona hættulegar aðstæður. Ég varð bara að hlæja. Ég meina, það er ekki fræðilegur möguleiki að ungabarn geti lyft exi af þessari stærð, eða farið að veiða, eða skorið niður kalkún. Hann getur ekki einu sinni gengið. Þessar myndir eru unnar með Photoshop. Hann var aldrei í neinni hættu.“
Við vörum við efni myndanna, þær geta gefið þér tannpínu þær eru svo sætar.
