Ofurhjónin Beyoncé og Jay-Z tóku við Brit-verðlaununum sem besta alþjóðlega sveitin í gærkvöldi. Bey og Jay mættu ekki á verðlaunahátíðina en þökkuðu fyrir sig með hjálp hertogaynjunnar Meghan Markle.
Hjónin bjuggu til myndband sem birt var á hátíðinni þegar ljóst var að þau hefðu unnið. Í myndbandinu sést fyrst málverk af fyrrnefndri Meghan áður en myndavélin fangar hjónin.
https://www.instagram.com/p/BuHvan1gTfp/
„Við sendum innilegar þakkir til Brit-verðlaunanna fyrir þennan ótrúlega heiður,“ segir Beyoncé í myndbandinu. „Þið hafið alltaf verið svo stuðningsrík. Allt er ást. Þakka ykkur fyrir.“
Í lok myndbandsins má heyra sjö ára dóttur þeirra, Blue Ivy, öskra: „Af hverju?“ Þá segir Beyoncé: „Blue!“ og hlær.
Myndbandið er í anda senu úr tónlistarmyndbandi hjónanna við lagið APES-T þar sem þau standa fyrir framan málverkið Mona Lisa í Louvre-safninu í París.
