Daniel Radcliffe opnar sig upp á gátt um áfengisfíkn sína í nýju viðtali í vefþættinum Off Camera With Sam Jones. Hann segir að fíknin hafi náð tökunum í lífi sínu þegar að Harry Potter-æðið stóð sem hæst.
„Ég átti mjög erfitt með það, sérstaklega seinnipart unglingsáranna, að þegar ég fór á staði í fyrsta sinn leið mér, og það gæti verið ímyndun, eins og væri verið að horfa á mig þegar ég fór inn á bar eða krá,“ segir leikarinn. „Fljótlegasta leiðin til að gleyma því að væri verið að horfa á mig var að verða mjög fullur í mínu tilviki.“
Daniel lýsir þeirri gríðarlegu pressu sem fylgir því að vera aðalleikari í vinsælli kvikmyndaseríu, en hann lék titilhlutverkið í myndunum um Harry Potter á árunum 2001 til 2011, alls átta myndum.
„Hluti af pressunni eru þær væntingar að maður eigi alltaf að vera glaður,“ segir Daniel og heldur áfram. „Maður er í frábærri vinnu, maður er ríkur og maður á ekki rétt á að vera ekki spenntur út af þessu öllu, alltaf. Mér finnst það vera viss þrýstingur líka. Allt í einu hugsar maður: Heyrðu, ef ég er að finna fyrir mennskri tilfinningu eins og depurð, þýðir það að ég er að gera eitthvað rangt? Er ég ekki góður í því að vera frægur?“
Loks ákvað leikarinn að hann þyrfti að hætta að drekka áður en hann færi niður hættulega braut.
„Ég hef verið ótrúlega heppinn með fólkið í kringum mig á vissum tímabilum í lífinu. Ég hef hitt lykilfólk – sumt leikara, aðra ekki – sem gaf mér frábær ráð og þótti virkilega vænt um mig,“ segir hann. „Að lokum var þetta mín ákvörðun. Ég vaknaði einn morguninn eftir útstáelsi og hugsaði: Þetta er kannski ekki gott.“
Daniel hefur verið edrú síðan árið 2013.