Snapparinn Reynir Bergmann og Sólveig Ýr Sigurjónsdóttir eru hætt saman samkvæmt heimildum DV og eru bæði skráð einhleyp á Facebook. Reynir og Sólveig Ýr reka saman fyrirtækið Park and Fly.
Reynir bað Sólveigar á Tenerife í byrjun árs 2019. Þau eiga saman þrjár dætur. Sú yngsta er 17 mánaða og sýndi Reynir frá fæðingunni í beinni á Snapchat.
Reynir hefur einnig verið mjög opinn um baráttu sína við fíkniefni á samfélagsmiðlum og viðtölum við fjölmiðla. Hann sagði frá því á Snapchat í gær að hann væri fallinn aftur í fíkniefnaneyslu.
„Þannig er mál með vexti að ég hef verið að taka eitt og eitt hliðarskref (fall) síðustu tvö ár, þið eigið skilið að vita af því. [Ég lít svo á að fall er faraheill] og mun nú gefa í í batanum og minnka snappið töluvert á meðan. Ef maður segir ekkert er erfitt að stoppa feluleikinn.“
Reynir opnaði sig um baráttu sína við fíkniefni viðtali við DV í október 2018.
„Eftir allar meðferðirnar mínar og edrútímabilin mín þá hugsa ég alltaf þegar ég dett í það að ég geti fengið mér smá. En eftir tíu, fimmtán, átján skipti þá hefur mér aldrei tekist þetta. Samt hugsa ég þetta í skipti sautján og átján. Ég er búinn að hlaupa á þennan vegg átján sinnum. Átján sinnum sko, en samt alltaf jafn öruggur og fyrst þegar ég klúðraði þessu. Það sýnir hvað þetta er sjúkt,“ sagði hann í viðtalinu.