Valgeir Elís er 31 árs og býr í Keflavík. Kannski kannast einhverjir landsmenn við hann sem manninn sem sagði Ladda látinn í fyrra. Valgeir var greindur með geðhvarfasýki 2 í byrjun árs 2019 sem útskýrði ýmislegt í fari hans.

Valgeir er nýjasti gestur Föstudagsþáttarins Fókuss. Við ræddum um Ladda og ástæðuna fyrir því að Valgeir sagði hann látinn. Valgeir segist hafa verið óafvitandi í „bullandi maníu“ á þeim tíma en vill þó ekki nota það sem afsökun.

„Mér til varnar, en kannski ekki til varnar, en þá bjó ég ekki myndina til,“ segir Valgeir og vísar í myndina sem hann deildi af Ladda sem gaf í skyn að hann væri látinn.

„Ég sá myndina hjá öðrum manni í Keflavík, sem ég ætla ekki að nefna á nafn, og deildi þeirri mynd. En um leið og ég var búinn að því þá eyddi hann sinni mynd út, og það varð allt brjálað, fokking brjálað.“

Facebook-síða Valgeirs var og er opin þannig hver sem er gat séð færsluna. „Ég svaraði engum ummælum við myndina og svo fór sonur Ladda að skrifa við myndina og mér fannst mjög fyndið að eyða þeim ummælum. Ég veit ekki af hverju. Svo allt í einu sprakk þetta. Ég bjóst ekki við að þetta yrði svona, engan veginn,“ segir Valgeir.

„Ég fékk alveg sjúklega mikið af haturspósti. Fólk var að segja hvað ég væri ömurlegur og ógeðslegur og hvað ég ætti aldrei að gera þetta. Vinnan mín fékk sendan póst um „þennan homma sem er að vinna þarna“ og bara endalaust.“

Valgeir Elís er mjög virkur á samfélagsmiðlum og heldur úti opnum Snapchat-reikningi, @valgeirelis. Það er einnig hægt að fylgjast með honum á Instagram @valgeirelis.

Valgeir er nýjasti gestur Föstudagsþáttarins Fókuss og þú getur horft á þáttinn í heild sinni hér að neðan.

Þú getur einnig lesið viðtalið við Valgeir í heild sinni í helgarblaði DV.