Anna Kristjánsdóttir flutti til Tenerife í haust og hefur það býsna gott ef marka má dagbókarfærslur hennar á Facebook. Anna segir þar skemmtilegar sögur af ævintýrum sínum og á laugardag birti hún eina sem hefur fengið marga til að brosa.
„Í gær átti ég erindi vestur í Ameríkuhverfi hér í Paradís,“ segir Anna en Paradís Önnu er Tenerife.
„Þegar ég gekk ströndina frá Los Cristianos og yfir á Vista ströndina heyrði ég marga Svía en þegar kom upp á Laugaveginn skipti tungumálið yfir í íslensku. Mætti meira að segja heilli rútu fullri af Íslendingum á vegum Vita-ferða.“
Á leiðinni til baka gekk Anna hratt eftir Vista-ströndinni og það var þá sem hún tók eftir hjónum sem voru á sömu leið og hún og fannst henni maðurinn eitthvað kunnuglegur.
„Er ég var komin framúr þeim snéri ég mér við og það fór ekkert á milli mála. Þarna var Siggi Sigurjóns kominn með skeggið eins og í kvikmyndinni Hrútar og sama brosmilda augnaráðið sem gerir Sigurð Sigurjónsson svo sérstakan. Ég kastaði á hann kveðju en hann svaraði engu og lét sem hann þekkti mig ekki. Allt í lagi hugsaði ég, þekkt fólk vill gjarnan vera í friði fyrir áreiti þegar það er í fríi á sólarströnd og ég hélt áfram í átt til Los Cristianos.“
Anna hélt för sinni áfram og við smábátahöfnina í Los Cristianos hitti hún nokkra Íslendinga sem hún spjallaði við áður en hún hélt áfram.
„Skömmu síðar gekk ég aftur framhjá Sigga Sigurjóns og frú og kastaði aftur á hann kveðju, en hann sinnti því í engu fremur en í fyrra skiptið og ég hélt áfram heim á leið,“ segir hún en það var þá sem hún fékk allan sannleikann um Tenerife-för okkar ástkæra leikara.
„Eftir að heim var komið ákvað ég að senda Sigurði kveðju enda vinur á Facebook, „ertu með alskegg á Tenerife núna“? Hann svaraði og harðneitaði slíku enda á kafi í verkefnum heima á Íslandi.
Þá vitum við að tvífari Sigga Sigurjóns er staddur í Paradís eins og við hin.“