Ísland er lítið land og því kemur lítið á óvart að ýmsir þekktir landsmenn tengist blóðböndum. Það sem kemur aftur á móti örlítið á óvart er skoðunin á því hverju viðkomandi einstaklingar deila frekar en sameiginlegum fjölskylduboðum. Þetta eru þeir Íslendingar sem þú vissir kannski ekki að væru systkin.
Leikkonan og skartgripahönnuðurinn
Nanna Kristín Magnúsdóttir, leik- og kvikmyndagerðarkona, er systkinamörg en einn af bræðrum hennar er Jónas Breki Magnússon, skartgripahönnuðurinn á bak við merkið BREKI. Jónas uppgötvaði ást sína á skartgripagerð þegar hann spilaði íshokkí sem atvinnumaður í Finnlandi og lærði iðnina síðar í Kaupmannahöfn. Nanna Kristín er Íslendingum vel kunn og hefur heillað þjóðina í leiklistinni síðustu áratugi, til að mynda í kvikmyndunum París norðursins og sjónvarpsþáttunum Pabbahelgum.
Hæfileikarík hálfsystkin
Leikarinn Hjörtur Jóhann Jónsson og leikkonan Helga Braga Jónsdóttir eiga sama föður. Helga Braga hefur verið Íslendingum vel kunn í áraraðir, frá og með upprisu Fóstbræðra, en Hjörtur hefur mikla reynslu af leikhússenunni og hefur komið víða fram í sjónvarpi og kvikmyndum.
Systkin sem syngja
Emmsjé Gauti, einn fremsti rappari landsins, er fjarri því að vera sá eini í ættinni sem spreytir sig á sviði listarinnar. Systir hans, tónlistarkonan Karin Sveinsdóttir, sem gengur einnig undir listamannsnafninu Young Karin, er ekki síður hæfileikarík. Þau vita hvað þau syngja.
Pólitík í boðinu
Eflaust má segja að leikkonan Ilmur Kristjánsdóttir og systir hennar, Lísa Kristjánsdóttir, eigi líflegar umræður um pólitík í jólaboðum og á fjölskyldusamkomum. Ilmur var varaborgarfulltrúi í Reykjavík fyrir Bjarta framtíð hér um árið en Lísa var um skeið aðstoðarkona Katrínar Jakobsdóttur forsætisráðherra, en það var á þeim tíma þegar Katrín var formaður Vinstrihreyfingarinnar. Hver segir svo að megi ekki ræða um pólitík við matarborðið?
Tilfinningar og tónlist
Hjalti Rúnar Jónsson leikari og Eyvindur Karlsson tónlistarmaður eru hálfbræður. Þeir eru synir Maríu Sigurðardóttur, sem var einu sinni leikhússtjóri hjá Leikfélagi Akureyrar. Það vantar svo sannarlega ekki listsköpunina á þeim bæ.
Saman í salnum
Þau Björn Bjarnason og Valgerður Bjarnadóttir eru dæmi um fleiri systkin sem hafa setið saman á Alþingi. Þau Björn og Valgerður sátu um hríð saman á þingi fyrir Sjálfstæðisflokk annars vegar og Samfylkingu hins vegar.
Lagamál og leiklist
Leikkonan Katla Margrét Þorgeirsdóttir kann listina að kitla hláturtaugar landans betur en flestir. Það ætti að gleðja systkin hennar, lögfræðingana Svein Andra Sveinsson og Herdísi Þorgeirsdóttur.
Verkefnastjórinn og svæfingalæknirinn
María Margrét Jóhannsdóttir, fyrruverandi verkefnastjóri WOW air, er systir Helga Jóhannssonar, sérfræðings í svæfingalækningum, sem starfar í Lundúnum. Helgi hefur getið sér gott orð innan læknaheimsins og var til að mynda á lista dagblaðsins Evening Standard í fyrra yfir áhrifamestu einstaklingana í Lundúnum árið 2018.
Kjarnakonur
Fjölmiðlakonan Kristín Ýr Gunnarsdóttir og Halla Gunnarsdóttir, ráðgjafi ríkisstjórnarinnar í jafnréttismálum, eru systur. Kristín starfaði um árabil hjá Stöð 2 og hefur getið sér gott orð í fjölmiðlageiranum. Halla er kennari að mennt með meistarapróf í alþjóðaviðskiptum frá Háskóla Íslands.
