Föstudagur 06.desember 2019
Fókus

Gunnhildur varð óvænt stjarna vikunnar: „Ég vil ekki að umhverfismál heltaki líf mitt“

Lilja Katrín Gunnarsdóttir
Föstudaginn 22. nóvember 2019 15:00

Gunnhildur þakkar Morfís fyrir ræðumennskuna. Mynd: Úr einkasafni

Ekki missa af Helstu tíðindum dagsins í pósthólfið þitt

Lesa nánar

„Ég hef alltaf verið haldin framkvæmdagleði. Ég tók þátt í Morfís og lærði þar kappræður. Ég fékk ráð frá þjálfurum mínum um hvernig ég gæti komið sem best út í sjónvarpinu og hvernig ætti að herja á. Ég vil gefa Morfís mest kredit fyrir ræðumennskuna og að ég hafi staðið í lappirnar þarna,“ segir Gunnhildur Fríða Hallgrímsdóttir, sautján ára nemi og aðgerðarsinni.

Sterk réttlætiskennd

Gunnhildur vakti mikla athygli á borgarafundi um loftslagsmál sem sýndur var á RÚV í vikunni. Var það mál manna að hún hafi staðið uppi í hárinu á ráðamönnum og verið rökföst í sínum málflutningi. Gunnhildur er fyrrverandi formaður Sambands íslenskra framhaldsskólanema og einn af stofnendum hópsins Loftslagsverkföll, sem hefur staðið fyrir loftslagsverkföllum síðan í febrúar á þessu ári. Gunnhildur útskrifast úr Tækniskólanum í desember og hefur lagt stund á tækni-, vísinda- og frumkvöðlafræði. Hún er býr í Hveragerði og tekur strætó á hverjum degi í skólann. Það voru tengslin við náttúruna sem urðu til þess að hún byrjaði að berjast fyrir umhverfinu.

„Ég bý nánast úti í sveit og er mjög annt um náttúruna. Við það að horfa á heimildamyndir og tala við mömmu, sem er heimspekikennari, um loftslagsmál áttaði ég mig á þvílíkt ranglæti þetta er. Þessi vá mun bitna fyrst á fólki sem býr í þróunarlöndum, ekki Vesturlandabúum sem halda áfram að neyta og sóa. Það er sterk réttlætiskennd í mér og ég varð svo pirruð að ég ákvað að gera eitthvað í þessu,“ segir hún.

Tók þetta alla leið

Eins og áður segir vakti Gunnhildur athygli á borgarafundinum í vikunni, en upphaflega átti hún aðeins að bera upp spurningu úr sal.

„Ég spurði hvort ég gæti ekki tekið þátt í kappræðunum, því ég vissi að unga fólkið myndi kvarta ef það hefði engan málsvara. Það var samþykkt,“ segir Gunnhildur. „Ég elska kappræður en ég var rosalega stressuð fyrst, sérstaklega þegar var verið að kynna alla inn. Mér fannst verið að gera mjög spennuþrungið sjónvarpsefni úr þessu. Þegar ég byrjaði að tala þá róaðist ég og ég hafði alltaf í huga að ég myndi sjá meira eftir því að segja ekki eitthvað róttækt heldur en að segja eitthvað sem væri aðeins of mikið. Þannig að ég tók þetta alla leið,“ segir Gunnhildur og bætir við að hún hefði viljað tala meira um lausnir í þættinum. „Það er alveg pólitískt. Það á ekki að vera pólitískt að loftslagsváin er til. Það eru vísindi. Það er hins vegar pólitískt hvernig við bregðumst við henni.“

Gagnrýnd fyrir að ferðast

Gunnhildur segist hafa fengið mikið lof fyrir frammistöðu sína í þættinum. Hins vegar hafi borið á gagnrýnisröddum líka og einhverjir hafa fett fingur út í að Gunnhildur hafi ferðast í sumar og flogið til útlanda. Gunnhildur reynir að taka ekki mark á slíkri gagnrýni.

„Ég er alls ekki fullkomin. Við þurfum ekki öll að vera fullkomin. Ef við minnkum neyslu um 20% erum við strax á góðum stað. Ef við segjum öllum að þeir verða að vera fullkomnir þá veldur það loftslagskvíða. Það er ekki heilbrigt,“ segir hún. „Ef maður er að reyna að vera aktífisti þá fer fólk fljótt að skjóta á mann sjálfan. Ég held að það sé leið til að vera ósammála málstaðnum að byrja að skjóta á flytjandann. Ég tek þessu ekki persónulega. Ég hugsa að ég hafi staðið mig ágætlega ef fólk er það sárt að það talar um það á samfélagsmiðlum að ég hafi verið að ferðast.“

Gunnhildur, í félagi við aðra í loftslagsverkfallshópnum, hefur sett þrýsting á stjórnvöld og reynt að sannfæra þau um ýmsar lausnir. „Það er ekki mikið hlustað,“ segir Gunnhildur. Hún trúir því að Ísland gæti verið leiðandi ríki í róttækum aðgerðum í loftslagsmálum, ríki sem aðrar þjóðir geta litið upp til. Hún segir aktífismann samt sem áður ekki heltaka allt hennar líf.
„Ég spila á píanó, mér finnst gaman að fara út með hundinn minn og ég rek fyrirtæki með vinum mínum sem heitir Robox. Ég vil ekki að umhverfismál heltaki líf mitt. Ég vil frekar virkja fleiri í baráttunni. Ég vil ekki að fólk haldi að ég ætli að taka baráttuna fyrir það. Við erum öll í þessari baráttu. Þetta á ekki bara að vera ég.“

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af

Fókus
Fyrir 2 dögum

Söguleg, vandræðaleg og sprenghlægileg augnablik í bresku sjónvarpi

Söguleg, vandræðaleg og sprenghlægileg augnablik í bresku sjónvarpi
Fókus
Fyrir 3 dögum

Þetta er það sem hefur sundrað Íslendingum á netinu – „Byrjun á heimsendanum“ – Hvorum megin stendur þú?

Þetta er það sem hefur sundrað Íslendingum á netinu – „Byrjun á heimsendanum“ – Hvorum megin stendur þú?
Fókus
Fyrir 3 dögum

Vikan á Instagram: „Mamma mín tekur myndir, hún er mega góð í því líka“

Vikan á Instagram: „Mamma mín tekur myndir, hún er mega góð í því líka“
Fókus
Fyrir 4 dögum

10 ástæður fyrir því að Andrés Ingi er toppmaður

10 ástæður fyrir því að Andrés Ingi er toppmaður