Lokastiklan fyrir nýjasta og níunda kaflann í Star Wars myndabálknum, The Rise of Skywalker, var frumsýndur í nótt. Myndin gerist einu ári eftir atburði síðustu myndar og standa nú hetjurnar Rey, Finn, Poe frammi fyrir lokauppgjörinu í baráttunni gegn Fyrstu reglunni og skuggahliðum hennar.
Nýir og gamlir bandamenn slást í för og magnast spennan magnast á milli Rey og Kylo Ren. Í sameiningu takast persónur myndarinnar á við nýjar hindranir, óvænta drauga úr fortíðinni og rísandi myrkraöfl sem leggja framtíð vetrarbrautarinnar í hættu sem aldrei fyrr.
Eins og sjá má í stiklunni snúa fjölmörg kunnugleg andlit aftur á sviðið en helst ber að nefna þá Billy Dee Williams og Ian McDiarmid sem Lando Calrissian og Palpatine, keisarinn alræmdi. Einnig bregða þau Mark Hamill og Carrie Fisher í hlutverkum systkinanna Luke og Leiu en Fisher lést í desember 2016. Miklar vangaveltur hafa verið um það hvernig hlutverki hennar verður háttað í The Rise of Skywalker í ljósi andlátsins. Talið er að J.J. Abrams, leikstjóri myndarinnar, og framleiðsluteymi hans ætli að styðjast við ónotaðar tökur úr sjöundu myndinni, The Force Awakens.
Þrátt fyrir vægast sagt blendin viðbrögð við seinustu mynd seríunnar, The Last Jedi, bíða margir ólmir eftir því að sjá hvernig lokahluti „Skywalker-sögunnar“ muni spilast út. Þetta mun vera sú mynd sem endanlega slúttar kjarnaþræðinum sem hófst með upprunalegu kvikmyndinni frá 1977.
Star Wars – Episode 9: The Rise of Skywalker verður frumsýnd þann 18. desember um allan heim.