Scott C. Waring er nokkuð þekktur talsmaður þess að geimverur séu raunverulegar. Hann telur mjög miklar líkur á því að geimverur hafi í liðinni viku verið að kukla í Reykvíkingum. Meginstraums fjölmiðilinn International Business Times greinir frá þessu.
Ástæðan fyrir þessu er mynd sem fatahönnuðurinn Sigga Maija deildi á Facebook á dögunum. Þar mátti sjá ský sem líktist einna helst eggi, eða svo telja vísindamenn. Waring telur hins vegar ekki nokkurn vafa á því að þarna hafi geimverur í fljúgandi furðuhlut, FFH, verið að skoða íbúa Hverfisgötu.
„Þeir gætu jafnvel verið að nema íbúa á brott og skila þeim svo stuttu síðar, án þess að viðkomandi verði þess var. Slíkt fyrirbæri kallast týndur tími en getur þó gerst svo hratt að fólk taki ekki eftir því. Það er óvenjulíklegt að þessi egglaga furðuhlutur hafi numið fólk á brott,“ skrifar Waring. Hann birtir svo myndina hér fyrir ofan en hann er örlítið búinn að eiga við hana.
Rétt er að taka fram að veðurfræðingar segja þetta svokallað vindskafið netjuský og það sé ekki svo óalgengt hér á landi.