Gunnar Smári Egilsson, fjölmiðlamaður og einn stofnenda Sósíalistaflokksins, er ekki mikill aðdáandi Breaking Bad, hvorki þáttanna né myndarinnar sem var frumsýnd á Netflix um liðna helgi.
„Þar sem ég gafst upp á öðrum þætti af Breaking Bad fannst mér árennilegt að horfa á El Camino: A Breaking Bad Movie á Netflix, bara tveggja tíma mynd á meðan serían er öll er meira en 60 klst. Hvílík tímasóun, flatneskja og leiðindi,“ segir Gunnar Smári á Facebook.
Óhætt er að segja að aðdáaendur Breaking Bad hafi beðið myndarinnar með mikilli eftirvæntingu og virðist hún hafa staðið væntingar, ef marka má gagnrýnendur. Breaking Bad-þættirnir voru sýndir á árunum 2008 til 2013 og eru þeir að margra mati í hópi bestu sjónvarpsþátta sem gerðir hafa verið.
„Ég er bara ekki að ná þessu Breaking Bad, álabbaleigir karlar sveittir af vandræðum og hita í langdregnum senum sem eiga annað hvort að vera smart eða artí. Hvers vegna ætti ég að hafa áhuga á vanda þessara manna? Ég sé eftir að hafa ekki frekar farið aftur á Jókerinn í bíó eða horft aftur á Svona fólk á ruv.is, mikil lifandi blessun eru þeir þættir, svo mikilvægir en samt svo skemmilegir.“
Ljóst er að ekki eru allir sammála Gunnari Smára og benda margir á að hann hafi gefist upp á þáttunum allt of snemma. Magnús Halldórsson blaðamaður er einn þeirra. „Þú gafst upp of snemma, mitt mat. Ekki gefast upp! Frábærir karakterar og stórleikur.“