Úkraínski tónlistarmaðurinn Alekseev frumsýndi nýtt tónlistarmyndband fyrir fimm dögum. Myndbandið, sem var tekið upp á Íslandi, hefur vakið mikla athygli og fengið yfir 1,4 milljón áhorf á YouTube.
Hulda Vigdísardóttir, málfræðingur, fyrirsæta og Queen Beauty Iceland 2019, leikur í tónlistarmyndbandinu.
„Þetta var ótrúlega gaman,“ segir Hulda í samtali við DV.
„Þau voru að bíða eftir myrkri, en þetta var tekið upp í ágúst og það var alveg bjart fram eftir. Þannig við þurftum að bíða mjög lengi. Svo vorum við að vinna með „hologram“ efni og vorum með alls konar kastara og ljós, þetta var mjög gaman.“
Aðspurð hvernig tilfinningin sé að vita að yfir milljón manns hafa horft á hana í myndbandinu segir Hulda að það sé „geðveikt.“
Hún segist hafa haft einhverja hugmynd um að tónlistarmyndbandið yrði vinsælt, en Alekseev nýtur mikilla vinsælda í Úkraínu og tók til að mynda þátt í Eurovision árið 2018.
„Leikstjórinn er líka mjög þekktur. Þegar við fórum á Skógarfoss voru margir túristar sem stoppuðu okkur og vissu alveg hver Alekseev var,“ segir Hulda.
Ísland er í aðalhlutverki ásamt Huldu í myndbandinu. Horfðu á það hér að neðan.