Undanfarna viku hefur verið talað um fátt annað en Öldu Karen Hjaltalín og vafasama heimspeki hennar. Færri vita þó að Jón Gnarr, skemmtikraftur og fyrrverandi borgarstjóri, kynnti svo gott sem nákvæmlega sama boðskap í þáttunum Mér er gamanmál með Frímanni Gunnarssyni.

Alda Karen sagði í liðinni viku að lausnin við fjölgun sjálfsvíga á Íslandi væri að viðkomandi segði einfaldlega við sjálfan sig „ég er nóg“. Hafa sérfræðingar dregið í efa hæfni hennar til að ráðleggja fólki með andleg veikindi, einnig það siðferðislega álitamál hvort það eigi að taka fé fyrir slíkt. Einnig hefur hún hvatt fólk til þess að kyssa peninga. En Alda hefur einnig fengið stuðning héðan og þaðan, síðast frá Óttari Guðmundssyni geðlækni.

Umræddir þættir voru sýndir árið 2010 og í þeim ræddi Gunnar Hansson, í gervi Frímanns, við þekktust grínista Norðurlandanna. Þar á meðal voru til að mynda Frank Hvam úr Klovn og svo Jón Gnarr. Grínistarnir léku ávallt ýktari útgáfu af sjálfum sér í þáttunum, Hvam var til að mynda gífurlega stoltur af „blowjobmaskine“ sem hann hafði fundið upp.

Jón var hins vegar talsvert upptrekktari en hann er í raun. Á einum tímapunkti í þættinum spyr Frímann Jón hvort hann upplifi þunglyndi. Svar Jóns var að hann væri hættur því og minnir útskýring hans talsvert á boðskap Öldu Karenar. Á einum stað miðar Jón Gnarr byssu að höfði sér og segir síðan:

„Hefur þú hugleitt það að svipta þig lífi? Veistu hvað ráðið er við því? Hættu því. Það er nákvæmlega svo einfalt.“

Það atriði úr þættinum hjá sjá hér fyrir neðan en leikstjóri þáttanna, Ragnar Hansson, deildi þáttunum í fullri lengd á Vimeo fyrir tveimur árum.