Aldur er afstæður en oft getur það komið á óvart hve ólíkir jafnaldrar eru. DV ákvað því að fara yfir aldur nokkurra landsþekktra Íslendinga og kom margt á óvart þegar leitað var að jafnöldrum.
Frjálsíþróttakonan Aníta Hinriksdóttir og áhrifavaldurinn Sunneva Eir Einarsdóttir hafa kosið mismunandi leiðir í lífinu en þær eru báðar fæddar á því herrans ári 1996 – Aníta í janúar, Sunneva í ágúst.
Handknattleiksmaðurinn Aron Pálmarsson og Eurovision-hetjan Jóhanna Guðrún eru bæði fædd árið 1990.
Fótboltakappinn Gylfi Þór Sigurðsson er fæddur í september árið 1989 en söngvarinn Eyþór Ingi Gunnlaugsson í maí sama ár.
Aðgerðasinninn Smári McCarthy er fæddur 7. febrúar árið 1984. Tobba Marinós er hins vegar fædd 7. desember sama ár.
Leikkonan Ágústa Eva Erlendsdóttir og stjórnmálamaðurinn Ásmundur Einar Daðason eru fædd sama ár, þótt ótrúlegt megi virðast.
Stjórnmálamaðurinn Pawel Bartoszek og fjölmiðlamaðurinn Auðunn Blöndal eiga líklegast ekki mikið sameiginlegt. Þeir eru hins vegar fæddir sama ár.
Tónlistarkonurnar Hafdís Huld og Birgitta Haukdal eru jafngamlar handboltakappanum Guðjóni Val Sigurðssyni.
Árið 1978 var stórt ár. Þá komu til að mynda í heiminn knattspyrnugoðsögnin Eiður Smári Guðjohnsen, Erla Hlynsdóttir, fyrrverandi framkvæmdastjóri Pírata, og söngvarinn Jógvan Hansen.
Tónlistarfólkið Svala Björgvins og Jón Jósep Snæbjörnsson, Jónsi, eiga sama afmælisár.
Forsætisráðherra vor, Katrín Jakobsdóttir, fæddist þann 1. febrúar árið 1976. Í september það sama ár kom tónlistarmaðurinn Mugison í heiminn og í desember fæddist athafnamaðurinn Lárus Welding.
Leikarinn Ólafur Darri Ólafsson og handboltahetjan Ólafur Stefánsson eiga ekki mikið sameiginlegt nema fæðingarárið.
Söngkonan Anna Mjöll Ólafsdóttir og Bjarni Benediktsson fjármálaráðherra fæddust bæði í janúar árið 1970. Í mars það sama ár kom síðan tónlistarmaðurinn Páll Óskar Hjálmtýsson í heiminn.
Jón Gnarr hefur margoft sagt frá því að hann eigi afmæli 2. janúar, á sjálfum talningardeginum. Jón fæddist árið 1967 líkt og kaupsýslumaðurinn Björgólfur Thor Björgólfsson og þúsundþjalasmiðurinn Birgitta Jónsdóttir.
Óvíst er hvort stjórnmálakonan Bjarkey Gunnarsdóttir sé söngelsk en hún er jafngömul Björk okkar Guðmundsdóttur.
Söngvarinn Bergþór Pálsson kom syngjandi í heiminn árið 1957, líkt og stjórnmálakonan Lilja Rafney Magnúsdóttir.
Margir landsþekktir einstaklingar fæddust árið 1955, til að mynda Siggi Sigurjóns leikari, Steingrímur J. Sigfússon pólitíkus, söngkonan Diddú og rithöfundurinn Einar Kárason.
Davíð Oddsson, ritstjóri Morgunblaðsins, er jafngamall jarðfræðingnum og stjórnmálamanninum Ara Trausta Guðmundssyni.