Tímaritið MAD kom fyrst út sem gamansöm teiknimyndasaga árið 1952. Einkennismerki tímaritsins hefur verið hörð ádeila á samtímann, þá sérstaklega stjórnmál og skemmtanabransann. Í vikunni var það hins vegar tilkynnt að mánaðarlegri útgáfu MAD verður hætt eftir að ágústheftið kemur út. Eftir það verður hægt að næla sér í hefti af MAD uppfull af gömlu efni í nýjum búningi. Þá verða einnig gefin út einhver sérrit í nánustu framtíð.
Þetta markar viss tímamót því MAD og lukkudýr tímaritsins, Alfred E. Neuman, á sérstakan stað í hjörtum margra. Ekki síst fyrir þær sakir að hægt var að brjóta upp á baksíðuna til að leiða í ljós hnyttna skrítlu. Fjölmargir syrgja ritið á samfélagsmiðlum, þar á meðal skringilegi listamaðurinn Al Yankovic.
„Ég er virkilega leiður að heyra fréttirnar um að MAD sé hætt útgáfu eftir nærri 67 ár. Ég get ekki lýst þeim áhrifum sem tímaritið hafði á mig sem ungan mann – það er eiginlega ástæðan fyrir því að ég varð skrýtinn. Ég kveð eina af merkustu stofnunum Bandaríkjanna,“ skrifar hann á Twitter. Grínistinn Drew Carey tekur í sama streng. „Ég er í rusli. Ein af bestu teiknimyndasögunum sem nokkurn tímann hafa komið út.“
Á þessum tímamótum ákváðum við á DV að rifja upp nokkrar goðsagnakenndar forsíður þessa sögufræga rits.
Sámur frændi var tíður gestur á síðum MAD og notaður sem tól fyrir MAD-liða að gagnrýna herskyldu og stjórnvöld í Bandaríkjunum.
Hér er árlegri hefð flugvarnarstofnunar Bandaríkjanna að leita að jólasveininum gerð skil. Hún endar með heimsenda og kjarnorkustyrjöld.
MAD birti oft grín þar sem lukkudýrið Alfred E. Neuman bauð sig fram sem forseta – raunar í hvert sinn sem forsetakjör fór fram í Bandaríkjunum.
MAD-liðar voru einnig ansi sniðugir árið 1960 þegar þeir spáðu eiginlega fyrir um sigur í forsetakjöri með hressilegri baktryggingu, eins og sést á for- og baksíðu blaðsins. Þetta grín var endurtekið fjörutíu árum síðar þegar að George W. Bush og Al Gore börðust um forsetastólinn.
Þessi forsíða af forsetaframbjóðandanum Hillary Clinton er líka ansi skemmtileg og vísun í kvikmyndina Mad Max: Fury Road. MAD og Mad – fattiði?
Það slær þó fátt út þessa forsíðu af sjálfum Donald Trump.
Auðvitað gerði MAD grín að sjónvarpsseríunni Stranger Things.
Meira að segja Justin Bieber fékk að kenna á MAD.
Jafnvel poppkóngurinn Michael Jackson fékk sinn skerf af háði vegna ásakana um barnaníð.
