Sara Pétursdóttir, eða Glowie eins og hún er betur þekkt, er að gera það heldur betur gott í tónlistarheiminum. Hún gaf nýlega út fyrstu plötu sína „Where I Belong.“
Glowie hitaði upp fyrir tónleika söngkonunnar Marinu fyrir stuttu og mun hita upp fyrir tónleika Ed Sheeran á Íslandi í ágúst næstkomandi.
Hún hefur verið á samning við Columbia Records síðastliðin tvö ár og er tiltölulega nýflutt til London.
Glowie var í viðtali við GQ sem kom út fyrr í dag. Í viðtalinu fer hún yfir dansferillinn, nýju plötuna, skilaboðin í tónlistinni, London og listafólk sem hún lítur upp til.
Glowie segir að það sem hún elskar við að búa í London er hvað hún getur verið frjáls og skrýtin.
„Á Íslandi er allt svo lítið. Þegar þú ferð út úr húsi þá sérðu alltaf einhvern sem þú þekkir. En hérna í London, það sem ég elska við það er að öllum er skítsama um hvernig fólk lítur út eða klæðir sig. Mér finnst ég geta klæðst einhverju klikkuðu dressi og enginn er að fara að snúa sér við eða stara á mig. Ég get sungið upphátt með heyrnatól í eyrunum og öllum er sama. Það er það sem ég elska við þetta: að geta verið gjörsamlega frjáls og skrýtin,“ segir Glowie.
Glowie segir að hún myndi vilja vinna með Khalid. „Ég elska tónlistina hans. Hún er mjög tilfinningarík, ungleg, frjálsleg og jákvæð. Og röddin hans er ótrúleg. Ég held að raddir okkar myndu passa vel saman.“