Tónlistarmaðurinn ástsæli Friðrik Dór Jónsson tilkynnir það á Facebook-síðu sinni að nú sé komið að því að selja einbýlishús sitt í Hafnarfirði.
Um er að ræða mikið endurnýjað fjögurra herbergja einbýlishús í Hafnarfirði byggt 1943. Húsið er á þremur hæðum, tvær hæðir og kjallari.
Ásett verð er rétt tæplega 60 milljónir króna. Friðrik Dór ber húsinu góða sögu. „Ég og stelpurnar ætlum að færa okkur aðeins um set í Firðinum fagra og því er Hraunbrúnin okkar góða komin á sölu. Hér er dýrðlegt að drekka morgunbollann á pallinum, stutt í nýja ærslabelginn á Víðistaðatúni, skóla og leikskóla og auðvitað stutt í miðbæinn okkar fagra. Ég sé það núna þegar ég skrifa þennan texta að það er í raun fáránlegt að við séum að selja,“ segir hann á Facebook.