Sólborg Guðbrandsdóttir blaðakona, söngkona og aktívisti heldur úti síðunni @Fávitar á Instagram. Síðan er átak gegn stafrænu og annars konar kynferðisofbeldi. Þar tekur Sólborg mikilvægar og umdeildar umræður tengdar til að mynda samþykki, kynlífi og ofbeldi.
Í gær setti Sólborg inn skilaboð á Instagram þar sem hún sagðist fá ágætis magn af skilaboðum frá fullorðnu fólki sem segir að það sé ekki eðlilegt að „svona ung börn stundi kynlíf.“
Því svaraði Sólborg: „Mjög mörg börn MUNU stunda kynlíf hvort sem ykkur þykir það eðlilegt eða ekki. Ætlið þið að shame-a þau fyrir það eða sýna þeim skilning og vera til staðar? Ykkar er valið.“
Spurði fylgjendur
Sólborg setti fram tvær spurningar fyrir fylgjendur sína.
„Þið sem stunduðuð kynlíf í fyrsta skipti ung: Hvernig brugðust foreldrar ykkar við þegar þau komust að því?“ Og: „Hvernig hefðu þau geta verið meira til staðar fyrir ykkur?“
Viðbrögðin létu ekki á sér standa. Fjöldi fólks svaraði Sólborgu og voru svörin eins misjöfn og þau voru mörg. Sumir sögðu að foreldrar þeirra skömmuðu þau eftir að hafa komist að því að þau höfðu stundað kynlíf. Aðrir sögðu að foreldrarnir gáfu þeim leiðsögn og ráð. Hér má sjá nokkur svör, en það er hægt að sjá alla umræðuna á Instagram-síðu @Fávitar, í „highlights“ undir Foreldrar.
Foreldrum stóð ekki á sama um umræðu Sólborgar og sendu henni skilaboð. Sólborg svaraði þeim í Instagram Story.
„Ég er ekki að hvetja ung börn til þess að byrja að stunda kynlíf. Ég er að minna þau á að þau eigi líkama sinn sjálf og það sé EKKERT skömmustulegt eða ljótt að vilja njóta hans sjálf eða með einhverjum öðrum. Þið foreldrar, sem eruð að skamma mig fyrir það, megið girða ykkur í brók.“
Sólborg ákvað að deila sinni reynslu á Instagram af því að stunda kynlíf í fyrsta skiptið. Hún deilir mynd þar sem stendur: „Ég var 14 ára. Ég gerði ekkert rangt.“
„FOKKIT! Ég var 14 ára þegar ég stundaði fyrst kynlíf með annarri manneskju. Það var fullkomlega eðlilegt og ég upplifði mig í stakk búna til að taka þá ákvörðun sjálf. Margar vinkonur mínar upplifðu sig ekki tilbúnar og stunduðu þar af leiðandi ekki kynlíf á þeim aldri. Þetta var ákvörðun sem foreldrar mínir hefðu aldrei geta komið í veg fyrir að ég tæki, enda voru þau búin að upplýsa mig allt mitt líf um það að ég ætti minn líkama sjálf og ég réði ferðinni. Ég gerði ekkert rangt og ekkert ljótt. Ég gerði það sem mig langaði til og hafði fullan rétt til þess. Það sem skiptir máli er að við eyðum skömminni í kringum kynlíf.
Auðvitað hafa foreldrar eitthvað um málið að segja þegar kemur að börnunum þeirra. Þar kemur mikilvægi fræðslunnar inn, að foreldrar séu til taks, upplýsi um mikilvægi verja, um kynlífið sjálft, mörk og mögulegar afleiðingar fari börn ekki gætilega.
Ég var tilbúin 14 ára. Aðrir verða tilbúnir 30 ára og sumir vilja aldrei stunda kynlíf. Það er allt saman eðlilegt. Börn eru ótrúlega ólík og þroskast mishratt. Því er gjörsamlega ómögulegt að ætla að festa einn ásættanlegan aldur fyrir alla til að byrja að stunda kynlíf. Það sem hentar mér hentar þér kannski ekki og það er allt í góðu.
Með opinni umræðu um kynlíf er ég ekki að hvetja öll börn til þess að byrja að stunda það. Þvert á móti hvet ég þau til að fylgja eigin sannfæringu, óháð því hvað öðrum kunni að finnast um það.
Þú ert kannski ekki tilbúin/nn/ð 14 ára en ég var það. Ég mátti gera þetta. Ég var eðlileg. Ég gerði ekkert ljótt og ég mun aldrei skammast mín fyrir það.
Foreldrar hafa val:
Að upplýsa börn sín um kynlíf á jafningjagrundvelli og gera það þar af leiðandi líklegra að barnið taki upplýstar ákvarðanir fyrir sig sjálft. Eða foreldrar geta neitað að hlusta á vilja og skoðanir barnsins, skammað það fyrir eðlilegar tilfinningar og sleppt því að vera til staðar.
Þú kemur ekki í veg fyrir að barnið þitt stundi kynlíf en þú getur haft gríðarleg áhrif á upplifunina.
Hvort hentar þér betur?“
