Sigrún Sigurpáls er fjögurra barna móðir búsett á Egilsstöðum. Sigrún er betur þekkt sem „Sigrún þrifasnappari,“ en hún er einn af upprunalegu íslensku þrifáhrifavöldunum.
Sigrún ætlar sér að gefa í á samfélagsmiðlum og vera meira áberandi á næstunni. Hún og fjölskylda hennar voru að kaupa gamalt hús sem þau ætla að gera upp og leyfa áhugasömum að fylgjast með ferlinu.
Eftir að hafa eignast þrjú börn með stuttu millibili ákvað Sigrún að breyta um lífsstíl og missti tólf kíló án nokkurra öfga.
Í samtali við DV ræðir Sigrún um Snapchat-ævintýrið, framkvæmdirnar og þyngdartapið.
Þriggja ára Snapchat-afmæli
„Það voru þrjú ár núna í febrúar frá því að ég byrjaði á Snapchat. Ég var á þeim tíma heima í fæðingarorlofi og ákvað að opna snappið mitt. Ég var búin að vera að fylgjast með Guðrúnu Veigu vinkonu minni en mér finnst hún mjög skemmtilegt. Mig langaði að prófa. Út frá því fékk ég fleiri fylgjendur og ég er enn að,“ segir Sigrún.
Sigrún er aðallega á Snapchat. „Fylgjendahópurinn minn er mikið stærri á Snapchat heldur en Instagram.“
Hún segir að markhópurinn sinn sé aðallega konur, 25 ára og eldri. „Ég hef samt fengið skilaboð frá tólf ára stelpu og sjötugri konu, þannig að aldurshópurinn er breiður,“ segir Sigrún.
Mikil viðbrögð við þrifum
„Þegar ég byrjaði á Snapchat var ég mest að sýna frá þrifum. Ég sagði líka frá mínu lífi og sýndi alls konar fjölskyldutengt. En einhvern veginn urðu þrifin langvinsælust,“ segir Sigrún.
Hún segir að þrifin hafi kallað fram mestu viðbrögðin. Fólk fór að leita mikið til hennar og spyrja hana ýmissa þrifatengdra spurninga.
„Núna eru samfélagsmiðlarnir mínir allt í bland. Ég var að flytja og við erum að fara í framkvæmdir. Við vorum að kaupa gamalt hús og ætlum að taka það í gegn. Fólk er alveg ótrúlega spennt fyrir því,“ segir Sigrún. „Ég hef verið mikið að gera DIY-verkefni og sýnt frá því.“
Fylgir sjálf þrifaáhrifavöldum
Sigrún segir að það hafi komið henni á óvart hvað þrifin slógu í gegn meðal fylgjenda en tengir þó við það.
„Ég fylgi fullt af konum á Instagram sem sýna alls konar þrifatengt. Mér finnst þetta mjög áhugavert og skemmtilegt. Þannig ég tengi alveg við það að fólk vilji sjá meira af því og leita ráða,“ segir Sigrún.
Engir öfgar
Sigrún var átján ára þegar hún varð móðir. Elsta dóttir Sigrúnar er að verða sextán ára og fer þá í æfingaakstur. Sigrún eignaðist næstu þrjú börn á sex árum og verða þau sex ára, fjögurra ára og tveggja ára á árinu. Sigrún hefur misst tólf kíló síðan í október 2018.
„Ég er búin að eiga þrjú börn á sex árum. Á milli hverrar meðgöngu hafði ég ekki náð að koma mér í „mitt form“ sem mér líður vel í. Það er enginn staðall sem ég er að fara eftir heldur veit ég hvernig mér líður best. Ég var orðin þyngri en ég vildi vera og það kom að þeim tímapunkti að ég hugsaði með mér að annað hvort myndi ég snúa við blaðinu eða enda enn þá óánægðari með mig. Mér leið ekki vel, ég var þreytt og orkulaus. Ég tengdi það við lélegt mataræði og enga hreyfingu,“ segir Sigrún og heldur áfram:
„Ég byrjaði að ganga mikið og borðaði hollara. Ég minnkaði aðallega skammtastærðirnar. Ég fann að ég var að borða óþarflega stóra matarskammta. Í kjölfarið fóru hlutirnir að gerast. Annað sem hjálpaði mikið var að drekka sem minnst af áfengi, það svínvirkar,“ segir Sigrún og hlær.
Sigrún hefur ekki enn þá stigið fæti inn í líkamsræktarstöð síðan hún breytti um lífsstíl.
„Ég vill meina að ég kom brennslunni af stað með göngutúrunum. Svo fann ég að ég varð sífellt orkumeiri og núna hef ég mikið meiri orku fyrir daglegt líf. Ég var dottin úr því að nenna að sýna hvað ég væri að gera á Snapchat. Ég var orðin latari við daglega hluti sem ég þurfti að sinna.“
Fékk mikið af spurningum
Sigrún var ekkert búin að vera að leyfa fylgjendum sínum að fylgjast með lífsstílsbreytingunni og þyngdartapinu. Hún deildi fyrir stuttu síðan fyrir og eftir mynd í Instagram Story og fékk í kjölfarið fjölda spurninga.
„Ég fékk mikið af spurningum um hvað ég gerði til að léttast. Ég reyndi að svara eftir bestu getu og vil hafa það á hreinu að þetta er eitthvað sem ég geri algjörlega bara fyrir sjálfa mig. Ég er ekki að reyna að passa í eitthvað form eða einhverja samfélagslega staðalímynd,“ segir Sigrún.
„Ef fólk er að leitast eftir því að léttast þá er þetta góð leið. En ef fólk er hamingjusamt þá er það það eina sem skiptir máli.“
Ætlar að gefa í
Um þessar mundir er Sigrún heimavinnandi og vinnur á samfélagsmiðlum. Hún stefnir að því að fara á atvinnumarkaðinn þegar börnin verða aðeins eldri. „Við erum náttúrlega að fara í rosalegar framkvæmdir þannig það verður alveg nóg að gera,“ segir Sigrún.
Hún segist ætla sér að vera meira áberandi á samfélagsmiðlum.
„Ég er að fara að gefa vel í á samfélagsmiðlum. Ég er svona pínu út úr því ég bý ekki á höfuðborgarsvæðinu og ég finn það alveg. Til dæmis eru alls konar viðburðir sem ég get ekki tekið þátt í. Þannig ég er aðeins falin úti á landi en ég ætla mér að vera meira áberandi núna því fólk er svo spennt fyrir þessum framkvæmdum. Ég hlakka til að sýna frá því hvernig þú tekur gamalt hús sem er í niðurníðslu og gerir upp.“
Fylgstu með Sigrúnu á Snapchat og Instagram @SigrunSigurpals.
