Dánardómstjóri hefur úrskurðað að dánarorsök tónlistarkonunnar Dolores O’Riordan, söngkonu Cranberries, hafi verið drukknun. Dolores fannst látin á hótelhebergi í London þann 15. janúar síðastliðinn en talið er að áfengisneysla hafi átt stóran þátt í dauða hennar.
Þegar Dolores fannst látin var áfengismagn í blóði hennar 330mg í hverjum 100ml af blóði. Það er um það bil fjórfalt yfir refsimörkum þegar ökumenn eru grunaðir um ölvun við akstur. Breska blaðið Guardian greinir frá þessu og segir að Dolores hafi drukknað í baðkarinu.
Dolores hefði orðið 47 ára í dag, 6. september, en hún var stödd í London við upptökur á nýju efni. Í skýrslu dánardómstjóra er vitnað í skýrslu bandaríska læknisins Roberts Hirschfield sem ræddi við Dolores þann 26. desember síðastliðinn. Hann sagði að hún hefði verið í góðu jafnvægi og ekki minnst á neinar sjálfsvígshugsanir.
Telur dánardómstjóri að um slys hafi verið að ræða.