„Þetta er það sem þú vilt vera að gera þegar þú ert að vinna í kvikmyndageiranum,“ segir leikarinn Kit Harrington sem fer með hlutverk Jon Snow í hinum geysivinsælu þáttum Game of Thrones. Hluti af sjöundu þáttaröðinni var tekinn upp hér á landi en í viðtali við vefinn Men´s Journal lýsir Kit meðal annars krefjandi aðstæðum á tökustað.

Fram kemur að í sjöundu þáttaröðinni eigi áhorfendur von á fjölmörgum stórkostlegum og hrífandi atriðum.  Aðspurður svarar Kit að stór hluti hafi verið tekinn upp á Íslandi og það hafi svo sannarlega tekið á.

„Það var krefjandi að standa úti í 40 gráðu frosti og ísköldu roki. Það var frekar mikil reynsla.“

„En svona almennt þá elska ég að vera á tökustað,“ bætir hann við.

„Þú færð að fara á magnaða staði og stíga niður fæti á ótrúlegum tökustöðum, stöðum sem fólk þarf yfirleitt að borga sig inn á.

Þú getur í raun ekki kvartað yfir því að vera að frjósa úr kulda þegar þú ert staddur á stórbrotnustu stöðum í heiminum eins og Íslandi og Króatíu.“